Балха аьттув

Балха аьттув
Фото: serdalo.ru

ХIара Iуйрийна вай мехкарча школашка Iоховш эзараш дола бераш. Массанена хоза гIулакх, оамал Iомае еза, Iилмай кIоаргенашка кхоачаде деза. Атта болх бац из. ХIаьта а цу балхах кайоалаш, дикка толамаш доахаш, хьабоагIа хIара дийнахьа берашта хьалхашка латташ бола хьехархой. Бераш а дерригаш цхьатарра дац. ЦаIаш сабаре, дешара тIехьа доккхий толамаш доахаш да; вожаш сихо, дешара дукха тIера доацаш; кхоалагIдараш — геттара довне, дIаяхачунга лерг хьа ца хьокхаш. Царна массанена цхьатарра садетта дезаш ва хьехархо, кулг лаьца дугача бера санна нийса никъ хьехаш. Цудухьа шерагара шерага дукхагIа хулаш боагIа дика дешаш бола кIаьнкаш, йиIигаш, лакхара дешар дийша, вахаре шоашка кхаьча моттиг дика лелаеш бола кагий нахи мехкарийи. Хьехархочун балха итташ шераш дIаденна саг ювца безам ба са укх йоазонца.

Ткъо шу хьалха Сурхо тIарча ийс шера дешача школе со балха вахача хана, берашха йоI яр Нальгиев Iалаудина ПаьтIамат. Цу хана денз, хIара дийнахьа са бIаргашта кIалха йолаш хьайоагIа из а цо беш бола болх а. Хьехархошта а дешархошта а цхьатарра цIенхашта саг хет цу кхалсагах, хIана аьлча ше беш бола болх школан сий айлургдолча тайпара, кхувш боагIараш харцахьарча хIаманца хургбоацача тайпара бе гIерт из.

Школе музей е аьнна дагадийхар сона. Пхийттех шу гаргга ха я из хинна. Деррига вIаштIехьадаьнначул тIехьагIа, корага оттае решётка езаш дар гIулакх, хIана аьлча цу чу дар профессиональни художникаша дийхка сурташ. Уж лочкъадергда яха уйла еце а, лоравалар новкъа дацар. Ше лоралур, Дала а лораву йоах. Из хьанга яйтаргья яхаш, со хьувзача хана, цу кхалсага шийна дIатIаийцар из гIулакх. Бустам дIабенна дукха ха ялале, хьа а ена, Iооттайир кора дIачуоттае мара ца езаш, кийчча решётка. Из масал аз доаладир, Iалаудина ПаьтIамат хIамах бIакъожабеш йоацилга дIахайтар духьа. Иштта я из массадолча ше деча хIаманца, къаьстта а хьехархой балха тIа.

Нагахьа санна классе сатийна хуле, бераш гIаране-татане доацаш дагIе, ха мара дезац цу чу урок луш Нальгиева йолга. МоллагIа харцахьа лелаш дола бераш а «тIап» аьле совц, из йоагIилга хайча. Хов царна, цIагIарча даьга-наьнага хоам гIоргболга, урок ца еш хьавенавале, уж яьчул тIехьагIа мара шоаш чубохийтаргбоацилга. Вешта аьлча, деррига хьинар бакъахьара саг кхевара, цунна эздел, нах лархIар, воккхагIчун сийдар яха оамал Iомаяра тIадаьразадаь хул цун. Гургал теха, бераш арадаьлча, царга хьожаш, урок йолаелча чу ца водаш ара лелар малав, урокаш Iокхайса ведда водар малагIа ва, тIехьависа воагIар малагIа ва – шеддар зувш ба хьехархочун бIарг. Цкъаза цIагIа чуяхе, е уж школе хьабийхе даьшца- ноаношца къамаьл деш зе йиш я из кхалсаг. Цхьабарашца къамаьл де хала а хул. ХIаьта а ПаьтIамата корабоагIа царца бувца мотт. Вайна ховш ма хиллара, таханарча дешархошта юкъе кIезига бац, дукха мах бола телефонаш киса ехке, деша ухараш. БIарчча ди дIахьу цар истола кIалха уж телефонаш ловзаеш, цар чу хьежаш. Цу тайпарча дешархошца къаьстта а къовсам лоаттабу Нальгиевас. Телефонаш хьайоах, дай-ноаной хьабех, царца цIенхашттара къамаьл а дий мара дIалуц уж юха.

Иштта къовсам лоаттабу цу кхалсага, школе ухача берага товш доаца барзкъа дийха школе ухарашца а. Ховш ма хиллара, кхувш боагIараш шоай хоза барзкъа, дукха мах бола гIалкхаш, кхыдараш новкъосташка дIагойта безам болаш хул. Из де эггара аьттув болашагIа йола моттиг школа я, амма из аьттув бохабу цар дешархочун барзкъа дувхараш мара школан коа чу ца бутача хьехархочо. Джинсаш, майкаш, кроссовкаш – из дешархочун гIирс бац. Цудухьа классашка дагIа бераш баьде-кIай дешархочун барзкъа дувхаш а школе ухача бера хила ма доаггIара куц долаш а хул. Цхьаькха цхьа хIама да хьехархочунна гIо деш, юрти цу нахи дика бовзаш хилар. ЗIамига йолча хана денз укхаза хьалкхийна я из. Йовз наьха оамалаш, хьанца фу дувца деза хов. Арахьара тIавенача сагаца санна боацаш, цунца чура-тIера ба берий дай-ноаной. Вешта аьлча, деррига а Нальгиевай балха аьттонна хьадича санна да, цо къахьегача дукха йоккха йоацача школе.

Наьльгиев Iалаудина ПаьтIамат яьй 1972 шера 11 апреле Наьсаре. Вай Сибре Iодигале а цигара цIадаьхкачул тIехьагIа а цар дезал баьхаб Сурхо тIа. Цар дезале дерригаш пхи бер хиннад. Ши вошеи йишеи ПаьтIаматал доккхагIа да, цхьа йиша зIамагIа я. Эггара воккхагIвола Салаудин, дийша а дийша, вайцигарча аэропорте начальник волаш, къахьегаш ва карарча хана. ШоллагIа Фердовс я. Из Наьсаре маьре йолаш, ший дезал кхебеш яьллай. Цун ши воI тIема академе дешаш ва Петербурге. ВоккхагIвар укх шера дийша воалл, шоллагIвар кхы шин шера деша дезаш ва. ЙиIиг а я цун дийша, цо экономически факультет яьккхай. Фердовс хоза маха баккха ховш я. ПIаьтIамата шоллагIвола воша Ваха яхаш ва, из гIишлонхочун балха говзал караерзаь, карарча хана даь коа Сурхо тIа вах. Эггара зIамагIйола Хади республикерча больнице бIаргашта дарба деча отделене медйиша йолаш къахьегаш я. ХIаьта ПаьтIамата цхьанне хьехархочун никъ хержаб. Даьгахьара цхьаккха кхоачара саг хьехархо хиннавеце а, зIамига йолча хана денз цу балха бIарг тIаэттабар, хоза хийттабар цунна. Школа яьккха яьлча, еррига цун уйла цу тIа сецаяр. ДукхагIча даькъе из кхувш енай наьн-нанаца, ворхIлагIча-бархIлагIча йиIиг йолча хана денз, хьехархочун болх цунна мерзбеш яр йоккха саг. ТIой-Юртарча Дзауров Изноврий Лемка яхаш яр из. Цу хана йиIигашта аьттув болаш дар, школа яьккхача Шолжа-ГIалий тIа хьехархой училище деша а баха, цул тIехьагIа школе болх бар. Хала лийна саг хиннай из йоккха саг а, хIана аьлча ПаьтIамата нана Жарайдат мара кхы бер хиннадац цун. Из цох йолча хана, 1941 шера мар тIем тIа а вига, цига вала а венна, цу йиIига яьгIай из. 1944 шера кхаччалца цIагIа каьхат яздеш хиннав Муталиев Iаьлий Хьусен. Цо тIеххьара яздаь каьхат а долаш да. Бакъда вай мехках даьхачул тIехьагIа, цунцара бувзам хад, из де доацаш вайнав. Укхаза белгалдаккха лов из Муталиев Хьажбикарца Буро тIа гIалгIай хьехархой техникум яьккха хиннилга а хьехархочун болх беш къахьега лаьрхIа хиннилга а. Бакъда, оалаш ма хиллара, лийрхIар хиннадац, дегIар мара. Цу тайпарча, шоай мохк, сий, денал яхача дешай хам ховш болча нахах хьаяьннай вай ювцаш йола Сурхо тIара хьехархо. Мар воацаш, кхы дезал боацаш йисача ший наьн-наьнаца Iеш хиннай из йIаьххача хана. Цунгара дукха хIама а Iомадаьд, къаьстта а камаьрша хилар, кхыдар.Вешта аьлча, хьехам луш а ПаьтIамат цIагIа кхееш а хиннар из яр. Школе а яр йиIига дукха езаш хьехархо, из Гредасова Людмила Павловна яр. Юххьанцарча классашка мел йола урок хьехаш, берашта ма хулла дикагIа Iилмай юхьигаш йовзийта гIертар из. ПхелагIча бераш хьалчудаьлча а къастанзар из царех, класса кулгал а деш, математика урока тIа дешархой хьисаб де Iомабеш хилар эрсий кхалсаг. Цхьайтта класс яккхалца, уж дешархой дIа ца хецаш, чакх а йоал. Шийх шиш хетийташ, чIоагIа цIенхашта хьехархо хиннай из, ПаьтIамата яхачох. Эккажкъонгий-Юртарча №1 йолча школе деша ягIаш, ший хинна из хьехархо йицлуц цунна, дуккха хIама цунгара хьаийцад аьнна хеташ. Дукха хIама хьаIомадаьд цо даьгара-наьнагара а: Хьусена Жарайдатагареи Ахьмада Iалаудинагареи. Нана тахан а йолаш, ПаьтIаматаца Iеш я. Да воаца дикка ха я, из кхелхав 1998 шера.

Нальгиева ийслагIча классе ягIача хана, цунца яьха наьн-нана кхалх. Сурхо тIа цIайоагIе а, хIаьта а ше дешаш хинна школа йитац цо, Эккажкъонгий-Юрта Iо а ухаш, чакхйоаккх цо 10 класс. Из дар 1989 шера. Хьехархо хилале кхыйола кулгаговзалаш Iомаеш хиннай йоI. Эггара хьалха цо йоаккх швейни училище, цул тIехьагIа – бухгалтера курсаш. ТIехьагIо вайцига хьаяьлар цхьан шера йола хьехархой курсаш. Иштта нийсъелар из 1997 шера Сурхо тIарча ООШ оалача, ийс шера дешача школе. Декабрь бетта 21 шу доал, моттиг ца хувцаш, из укхаза къахьегаш йола. Хетаргахьа балха тIехьа из моттиг тайна хиннай цунна. Цхьа ха яр, тика хьа а йийлла, цкъа а шозза а школера дIаяха цунна дагадийха. ХIаьта а ший рузкъа укхаза хиларах, дIа ца йодаш юс из. Юрта №3 йола керда школа хьайийллача хана, цига а дIайийхаяр из, цига а дIа ца йодаш йисар Iалаудина ПаьтIамат.

Бусалба дешар дийша, дикка гаьнаяьнна я из. Эггара хьалха Iарбий мотт Iомабе из дIайолаелар, ноанахошка йолча хана. Экажкъонгий-Юрта амбулаторе балха йолаш я Муталиева Надифа. КъорIаш дийша а Iарбий дешар дика ховш а я из. Цо хьехаш, дIайолаелар ПаьтIамат юххьанца дIайолалуча хана. Массехк кIира цунгара Iомадаьр, дIакIоаргду даь-даь веший воI хиннача Або-моллаца. Бусалба дешар тIа гаьнаваьнна а юртарча имама амир волаш а вар из, ше дIакхалххалца йолча хана. Цхьа-ши шу мара дац молла кхелха. Цо дикка дIагаьнаяьккхар ПаьтIамат Iомадеш долча дешар тIа. Бувцач наха дика хьийхадале а, дуккха хIама ше ховш яле а, балха отташ хилча дешара тешал деш каьхат хила дезар. Цхьаццаболча гаргарча наха а, хьалха денз бовзаш хиннача хьехархоша а мерздийя, Сипсой-ГIалий тIарча ислам хьехача институте деша отт йоI 2000-ча шера. Цига ялх шера деша дезар. Цул совгI заочно деша йиш йолаш а яцар. Цигара дешар хIара дийнахьа дIааха везаш дар. Школе урокаш тела а институтера дешар царца тарде а атта дацар. Ца хиннача дийнахьара урокаш диктафонаца дIаязъяйташ, юкъахдита ди меттаоттаде дезар. Хала дар иштта деша, дале а институт цо чакхйоаккх. Цунна овттаяьча оценкашта юкъе кхоъ яцар, ерригаш йиаш-пхиаш яр. Цу дешарах а кхоачам беш яцар Нальгиева. Бусалба дешар дийша ше яьннача 2006 шера, цо каьхаташ дIачулу ГIалгIай паччахьалкхен университета ПМНО оалача факультете. ЗIамагIйолча классашка хьехаш а хургйолаш, дизза хьехархочун Iилма а довзаргдолаш, хIама дар цо леладаьр. Дешара министерствос, экзамен яла ца езаш, къамаьлага гIолла йоIа ховр техка, цига дIаэцийтар из. Школе болх бешше, деша йиш яр цига, из деша эттар заочни отделени хилар бахьан долаш.

Фу хьехаш хиннай хьехархо берашта? МалагIа Iилма? Ше укхаза эггара хьалха балха енача 1997 шера денз, Iарбий мотт хьехаш хьайоагIа из. Цу хана бусалба динца ювзаенна урокаш юкъейоалаь моттиг яцар ерригача республике, цудухьа Iарбий мотт Iомабар санна дIадоладаь хIама хиннад из. Еррига урокаш ше язъе а оттае а езаш хулар. ХIанз мо цу гIулакха эша книжкаш дацар цу хана. Юххьанца класс екъа а йийкъе, цаIаш Iарбий мотт Iомабе боагIар, вожаш болхар английски мотт Iомабе. Вешта аьлча дин бовхамаш ца хьехаш, Iарбий литературни мотт бар хьехаш хиннар. Кхы цхьа шу доаллаше, книжка а цунцара программа а араяьлар, кепа теха. Цунга хьежжа дIанийсбенна дIабахар болх а. Хьехархо воацаш моттиг нийсъелча, ПаьтIамата лора къахьегама урок а. Цо цхьан хана Iомаяь хIамаш тегара а кхыйола говзалаш а дика накъайоалар укхаза.

Карарча хана духхьал хьехархо хинна ца Iеш, школан кулгалхошта чуйоагIаш я из. Берашта кхетам баларах йола директора заместитель я Нальгиева. Атта болх из а бац. Бе безача тайпара, боагIача тайпара из хьабе йиш йоацаш моттигаш нийслу. Цу гIулакха мел эшар ца хилча, болх а лерттIа дIабодац. Ювцаш йола ийс шера деша школа цхьан хана юртарча берий бешá лаьрхIа хьалдаь, къаьст-къаьста дагIа цхьа гIат дола кхо цIа да. Укхаза яц спортивни зал, актови зал, дIачувахá репетици е къаьстта мукъа класс. Берашта деша бархI цIа-класс мара дац укхаза. Делкъелца а делкъел тIехьагIа а мукъа хилац царех цхьаккха, хIана аьлча укхаза шин сменах деш. Цул совгIа тIахьожам лоаттабе а кхетама болх бе а безаш хул, хIара дийнахьа яхар санна, урокашта тIехьабусарашца, йIаьххача хана, деша ца ухаш, цIагIа багIарашца. ТIабувха дешархой гIирс лорабе беза. Вешта аьлча, дешархочун бокъонаш телхаю бераш нийсача лостамагIа дIагIоргдола хIама де дезаш хул. Укхаза къоасталу, кхийна баьнна дIаайттача шоай дика цIи йоаккхийтаргьяраш малагIаш ба, харцахьарча хIаманца хургбараш малагIаш ба. Царех массанех мехка накъабоалаш, зуламе боацаш, нах хилийта гIерт хьехамча.Цхьабарашка шоай де дезаш дола дика хIама хIара денна низагIа дайта дезаш хул. Цхьабола дай-ноаной шоай берашка дика хьожаш ба, амма цхьабарех из ала йиш яц. Уж а вожаш а дика гуш хул, нагахьа санна журнал хьа а дийлла, цу тIа IотIахьежача. Бер дика дешаш дале, да-нана цунга хьожаш хилара дола тешал да из. Ишттача беро харцахьа хIама а дергдац, хIана аьлча цIагIара хьайоагIаш я цун бакъахьара оамал.

Берашта кхетам балара хетаяь тайп-тайпара сайренаш, цIайшта, дезача деношта хетадаь вIашагIкхетараш чакхдоахар а, уж школе кийчдер а Iалаудина ПаьтIамат я. Цу гIулакха оттаяь цIенхаштта план я, шийна юкъе дешархой нийса баха Iомабеш дола гIулакхаш а долаш. ЯлхлагIа шу да «Къахетам» аьнна цIи а тилла, дешархоша шоашта уллуврча бошта гIо ду. ХIара шера цар оагIув хьаллоац, цхьацца гIо-новкъостал ду новкъосташа, дукхагIча даькъе бераша ахча гулду. Эггара чIоагIагIа гIо эшачарга из дIа а кхоачийт.Традиционни хинна дIаэттад из хIама. Цо бераш Iомаду къахетаме хила а эшачоа гIо де кийча хила а. Вешта аьлча, дикача наьха оамалаш йолаш хила Iомаду цо бераш, масала, сагIийна хIама дала дезилга хайт, камаьрша хила, наьха бала болаш хила Iомабу. Адамий хьисапе хул уж хIамаш леладеш бола нах. ЦIаьрмата хилар во долга хайт цу тайпарча балхо, цул совгIа дог хьоаст да е нана, е уж шаккха доацачар, могаш доацача берий. Цу тайпара 30 дезал ба школанна чудоагIача доазон тIа.

Цхьацца болх бу укхаза берий деша дахка а самукъадаккха а безам хургболаш. Каст-каста школе боагIа цирка артисташ, берий театраш, халхараш ду, классашка дезача деношка чай малар чакхдоах, кхы дуккха да уж. Бийхе хул беза хьаьший а. Iалаудина ПаьтIамата укхаза хьийха хиннаб йоазонхой Аушев Султан-Хьамид, Чахкиев СаIид, бIаь шу даьнна хинна юртхо Аушев Турке, юртара имам Аушев Абабукар, хьажо вола Муцольгов Iалихан, Муцольгов АртагIа, Нальгиев Мухажар, Барахоев Ахььяд, кхыбараш. Дешархошта боккха кхаъ хул Наьсарерча музее е тIема сийлен мемориале бигача, кхыйолча моттигех. Вай къамо хьабена никъ, лайна хало а йовзийт царна хьехархочо, цар дукхагIа лоархIараш малагIа гIулакхаш хиннад, сий мишта лорадаьд дувц. Къаьстта а теркам тIабохийт берашта патриотически кхетам балара. «Турпала ди» чакхдоаккхача хана, дешархоша шоаш дакъа а лоацаш, дувц турпала цIи лелаеш болча вай мехкахоех лаьца: Р. Аушевх, С. Оскановх,

Ю. Евкуровх, М. Оздоевх, Ш. Костоевх, А. Мальсаговх, А.Костоевх, кхычарех.

Хоза хIама гойт хьехархочо а дешархоша а керда шу доагIаш, ноаношта хетадаьча дийнахьа, хьехархой дийнахьа, кхалнаьха бIаьстан цIай долаш. Геттара дегаш айденна болаш дезду Коталон ди 9 май, республикан а Конституцен а денош. Шеддар тIадерзадаь да берашта нийса кхетам балара, вай мехка кхоане хозъергйола къона, хьаькъал дола тIехье кхеяра.

Ший балха говзал кхыча хьехархошта дIайовзийта дагахьа, семинар-вIашагIкхетар а чакхъяьккхай ПаьтIамата. Укхаза венавар дин бовхамаш яха Iилма хьехаш вола 10-15 саг, школе Iомадеча книжка автор Дударов Iаддал-Мажит, кхыбараш. Карарча хана берашца дIахьош я тиша каьхат гулдара тIехьа яьржа яхь. Бераша тIормигаш диззе къаьна журналаш, книжкаш, газеташ кхухь школе. Цун массе а туре – уж кхоъ я – дакъа лаца лаьрхIа да уж. Вай хьунаш иштта лоарае лерхI Сурхо тIарча дешархоша. Хиш цIендеш, баьш тIа, школан коа, наIар тIа Iокхийса нувхаш гулъеш, болх бу цар. Цу берригача балха кулгал деш я Iалаудина ПаьтIамат. Къаьстта хьоахаде деза цо ший дешархой олимпиадашка кхийла а, дукха коталонаш яьха а хиларах. Цига хьалхара моттигаш яьхай Муцольгова Мадинас (2012), Измайлов Амира (2015), Булгучева Iашата (2016).

Цо хьегаш дола къа ца зувш дисац цунна уллув болх беш болча наха:

— ЧIоагIа хьинар долаш, кIаьдъялар фуд ца ховш, саг я Iалаудина ПаьтIамат,- йоах географе хьехархочо Дударов Аюпа Лидас. – Дукха къахьег цо берашца шоашца а цар даьшца-ноаношца а. Цудухьа шерагара шерага дуккха дикагIа, камаьршагIа, къахетамегIа хул дешархой, дешар а дикагIа деш.

Цо беча балха мах а беш, сийлан грамоташ тийнай хьехархочоа, царна юкъе я дешара министерствос, дешара районни управлене, бусалба дин Центро еннараш. Кхы а дукха хIама де лерхI Нальгиевас ший балха тIа, дIахо дIайодача хана. Цу новкъа цун аьттув балар лов.

С. Арчаков.

Сурта тIа: П. Нальгиева ший дешархошца

 
По теме
Гобаьккха дIа мел хьежача хьалъеш латташ гIишлош я вай республике. Хьалха лоха, къаьна, тиша цIенош даьгIача моттигашка урагIъух массехк гIат дола вIаштIардаь цIенош.
В связи с предстоящим юбилеем 100-летия образования ингушской государственности, Министерство культуры напоминает о Республиканском конкурсе на создание лучшей композиции, в рамках подготовки к юбилейному праздничному мероприятию.
Источник фото: Фото редакции Полиция от местной жительницы узнала, что женщина, которая назвалась Светланой Федоровой, под предлогом продажи посредством соцсетей мебели, бытовой техники и посуды, в 2022-2023 гг.
Источник фото: Фото редакции Национальный проект «Демография», как известно, нацелен на улучшение благосостояния семей за счет мер финансовой помощи, которые будут способствовать повышению рождаемости,
Глава Ингушетии Махмуд-Али Калиматов проверил, как ведутся восстановительные работы в многоквартирном доме, который пострадал в ходе проведения контртеррористической операции в Карабулаке.
В Государственном музее изобразительных искусств Республики Ингушетия открылась выставка произведений живописи «Вместе с Россией!».
С постоянным развитием технологий и возрастанием сложности задач, перед которыми стоят государственные структуры, использование цифровых решений и инструментов становится все более актуальным и необходимым.
Новая школа в с.п. Сурхахи открыла свои двери для учеников. Теперь у юных жителей сельского поселения есть достойные условия для получения знаний, социализации, духовного и физического развития и др.
Источник фото: Фото редакции По информации отделения, уже второй раз представители регионального управления федеральной службы безопасности страны передали общественникам свыше двадцати тонн продуктов длительного хран
photo_5343742741852575501_y (1) - Министерство культуры ГБУ «Филармония им. А. Хамхоева» станет организатором конкурса, в котором могут принять участие все желающие.
Министерство культуры
В ОФСИН России по Республике Ингушетия прошли пожарно-тактические учения - ОФСИН по Республике Ингушетия Сотрудниками ведомственной пожарной охраны ОФСИН России по Республике Ингушетия совместно с работниками пожарно-спасательной части № 4 г. Карабулак МЧС России по региону были проведены занятия,
ОФСИН по Республике Ингушетия
Суд апелляционной инстанции по уголовным делам Верховного суда Ингушетии 28.03.2024 рассмотрел материал досудебного производства по апелляционной жалобе защитника на постановление Магасского районного суда,
Верховный Суд
Корь - это острое инфекционное заболевание, характеризующееся общей интоксикацией, воспалительными явлениями со стороны слизистых глаз, носоглотки, верхних дыхательных путей, характерной сыпью.
Роспотребнадзор
В рамках реализации всероссийского проекта «ДоброВСело» врачи Сунженской центральной районной больницы совместно с волонтерами-медиками провели масштабное профилактическое мероприятие в сельских поселениях Чемульга и Аршты.
Газета Ингушетия
Стартовал региональный этап Всероссийского конкурса исследовательских проектов «Без срока давности» - Министерство Образования С 20 марта стартовал региональный этап Всероссийского конкурса исследовательских проектов «Без срока давности», который продлится до 10 апреля 2024 года.
Министерство Образования