Са мохк хьа хозленах аз доаккхал ду,
Ма гулда сона дунен тIа хьа во.
Зама йIоахал бахалба са мохк,
Кхы тIа ца доагIаш из бирса дохк.
Фусамех бехараш юха цIа гIолба,
Уж бохабаьрех къаьра дув гIолба.
Цар юха хьалдергда уж сийрда цIенош,
Синош дийнлургда кхуврчаш хьаллотош.
Де доацаш мел бараш мехках кхеталба,
Уж сецабаьрашта меттахь ди кхеталда.
ЙоагIаш йоа кхел ергья вай Дала,
Саго ма озалба вай эза бала.
Зизай беш санна тоаеннай ГIалгIайче,
Вай дегай ондало гIоза Наьначе.
Са мехка моцал, къел озаш саг вац
ГIалгIаел камаьршагI лаьтта къам дац.
Хьо хIанз а ГIалгIайче бер мо ховха я,
ХIаьта а ГалгIайче Бешлоам мо къаьна я.
Ер дуне мел латт хьа сийле йожаргьяц,
Хьол хозагI бола мохк дунен тIа бац!
Автор: Угурчиев Азмат-Гири