Октябрь бетта 22-ча дийнахьа Шолжера Культуран цIагIа «Что? Где? Когда?» яхача хьаькъала ловзара Республика йийла турнир чакхъяьлар. ГIалгIай Республика Къамана библиотекои «КЛИО» яхача хьаькъала ловзарий клубаи цхьана вIаштIехьадаьккхадар ловзар дIадахьар.
Дукха бар ловзара юкъе дакъа лаца баьхкараш. Вай мехкахой хиларал совгIа Нохчий мехкара а баьхкабар ловзарца чам бараш. Массане а ийс команд вIашагIтехар: «Baker street», «Цунами энтузиазма», «451 F», «Blackout», «Мимопроходимцы», «Алеа», «Черный союз», «Серый кардинал», «Brodyagi». Шин даькъе дийкъа дар ловзар, йиъ тураца къоастадаь а долаш. ЧIоагIа сакъердаме а чулоацам кIоарга болаш а дар хIара хаттар. Цхьа минот лора командашта хаттара жоп оттаде, цул тIехьагIа жоп тIадола каьхаташ хьаэцар. Хала хетача хаттара жоп хезача, «Iалаьлай, ма атта хиннад из» аьле хетар.
Ловзара шоллагIча дакъах 3-гIа моттиг яьккхар «Blackout» яхача командо, 2-гIа моттиг «Алеа» яхача нохчий командо яьккхар, 1-ра моттиг «451 F» яхача командо яьккхар. Ловзара хьалхарча керттерча дакъах 3-гIа моттиг «Алеас» яьккхар, 2-гIа моттиг «Blackout» командо яьккхар, хIаьта 1-ра моттиг «451 F» яхача командо яьккхар. ШоллагIча дакъах моттигаш яьхачарна грамоташ ялар, хьалхарча дакъах моттигаш яьхачарна кубкаш ялар.
Самукъане а сакъердамца а дIадахар ловзар. «КЛИО» яхача хьаькъала ловзарий клуба кулгалхо волча Патнаькъан ХIарона Адама хьоахадир хIара цхьан е шин бетта цу тайпара ловзараш дергхилар. ХIаьта из пайдане гIулакх да, хIана аьлча нах дукхагIа дешара сутарбу цу ловзара. Цунах тарра кхетам а кIоарглу наьха. Сона сайна а дукха хIама дайзад, дакъа лоацаш хиннаеце а. Баркал хилда царна а библиотека болхлошта а ловзар оттадарца самукъадаккхарах. Дала аьттув боаккхалба «КЛИО» клуба шоай дагалоацамашта тIакхача!
ВЕШКАРНАЬКЪАН
Фатима
Газета «Сердало» № 165