Къаман гIулакха лаьтта саг

Дукха нах баьхаб, хIанз а бах вай мехка, шоай гIулакх тIехьатетташ, мел йоккха хало шоашта хуле а, къаман юкъара гIулакх хьалхадоахаш. Иштта нах хилар бахьан долаш ди тIехьа тоалуш боагIа вай мохк, дуккхача хана денз дагалаьтта хIамаш кхоачашхулаш латт. ХIара дийнахьа яхар санна, кIезиг-кIезига къаманна ше дIавекъаш вар са вувца безам бола саг а. Из вар Абадиев ВоахIапа Бек. Иштта, Бек аьнна цIи йоаккхе а, из дIаоалаш аттагIа хиларах лелаеш яр цо, бокъонца йола цун цIи Утанбик яр. Из цIи цох наггахьа цунца болх беча маIача наха мара йоаккхаш а яцар, йоаккхача хана а шоаш салоIаш е цхьаннахьа сакъердаш хилча мара а яккхацар.

1981 шера июль бетта «Сердало» газете балха отта со венача хана, цун редакце эггара хьалха сона байзача нахах цаI вар Абадиев. Керттерча редактора цунна тIадилладар сона фу хов хьажар а, цул тIехьагIа, болх булургболаш вале, культура отдела корреспондента дарже хьаэца могавар а. Лохорча дегIара, лоа санна кIайбенна корта болаш, саг вар сона хьалхаваьнна, редакци а, къаьстта культура отдел а, цун декхараш а довзийташ лийннар. Хана сел воккха а ма вац ер, корта-м чIоагIа кIайбеннаб укхун, аьнна хийтар сона эггара хьалха. Цу хана Бека даьннадацар 43 шу мара, амма 70 — 80 шу даьннача воккхача сагабар санна бар йис йиллача керта бос. Халонаш, саготонаш дукха яйначох тара вар са хургвола хьаким. Цхьаькха цхьа хIама-м дар укхаза, Абадиев юхьа ше а кIай саг вар, жогIара бIаргаш а долаш. ЖогIара яхилга да, сийрда яхилга, бакъда сийна дац уж, баьццара лесташ да. Аз цу деша маIан дара бахьан да, цхьаццаболча вай Iилманхоша харцахьа даьшхад из дош. Цхьадолча даькъе цудухьа хеталора Бек селлара кIайвенна, хIаьта нонагIча даькъе из дувзаденна дар лайнача халонашца.

Сона гIалгIай мотт хой хьежа, йоазонах со лоархIавой а техка, ший зIамагIвола новкъост волаш (корреспонденталла) редакце балха дIаэца могавир со культура отдела керте латтача Абадиевс.

Иштта дIадоладелар тха довзар а ши шу совгIа йолча хана цхьана даьха балха денош а. Тхона юкъе пен мара бацар, из 614 кабинете вагIар, хIаьта со – 613 кабинете. Цу хана, ховш ма хиллара, газет Шолжа-ГIалий тIа дар, хIаьта Бек ше вахаш цигарча М. Калинина цIерагIча поселке вар. ХIанз отдел юкъара хинна ца Iеш, телефон а яр тха юкъара. Цхьайолча хана хьаким къамаьл даь валлалца, хьежаш вагIа везаш хулар гIулакх, хIана аьлча районашка гIолла фуд-малад хайна из валалехь дукха ха дIайодар.

Эггара хьалха, беча балха хьакъехьа дувцаш, отдела заведующе къоастадир ше а со а сенах яздеш хургва, цхьана болх беш йоаккхача хана. Болх бийкъар. Шийна из дикагIа довзарах, цу лостамагIа ше дийша хиларах, театр шийга дитар цо. Вешта аьлча, цо дукхагIа яздора театрах, цун артистех, Сийлахь-боккхача Даьймехка тIема ветеранех, изобразительни искусствох, музейша беча балхах. Сога кхаьчар школаш, спорт, унахцIено. Нийслора цкъаза, болх къеста ца беш, оаха тхоай йоазош деш а, аз театрах а, цо дешарах, унахцIенох, иштта кхы дIахо а. Цул совгIа, сона балха тIа гIо дергдола штате боаца корреспонденташ а бовзийтар цо, са декхараш аттача доахаш. Масала, царех яр Нохч-ГIалгIай Госкино комитета болхло В.Ковалёва. Вай мехка кинотеатрашка ара мел доалача конофильмех хоамаш дора цу кхалсага, цар чулоацам, режиссёраш, сценаристаш, ролаш ловзаю артисташ бовзийташ. ХIара кIира цкъазза редакце йоагIар Ковалёва. Иштта сона йовзийтар Р. Дудникова, I. Юсупов, Х-Б.Исраилов. ТIеххьарчо даьхка беламе сурташ шоашца долаш арадувлар хийла оаха деш дола йоазош. Царел совгIа, сона чIоаггIа гIо деш вар университета студент вола Барахоев Мухьмад. ТIехьагIа цох газета керттера редактор а цул тIехьагIа ГIалгIайчен телевидене председатель а хилар.

Бека юхе къахьегаро дукха хIама довзийтар. Эггара хьалха культураца бувзабеннача нахаца бувзамаш мишта оттадергда, деш долча йоазоний кIоаргалга, дикалга мишта кхоачаргва хайтар. Цо деш дола йоазош, хIара предложени тохкаш, цар уйла еш, Iомадора аз. Геттара езалора сона цо гIалгIай гIорбаьннача актёрех язъеш хинна очеркаш. ДагайоагIа РСФСР халкъа артистах, Нохч-ГIалгIай АССР Ленински комсомола преме лауреатах Цицкиев Мухтара Мухьмадах цо язъяь хинна «Артист хилва аьнна кхеллар» яха очерк. Йоккха говзал йолаш, хьинарах визза артист вар Цицкиев. Цунга хьежжа наха дукха а везар. МалагIа бахьанаш дар из наха селлара везаш хилара? Цу хаттара дизза жоп деннадар Бека ше цун вахара а кхоллама а наькъех дувцаш. Мухьмада дукха дика ролаш ловзаяьяр «Ромеои Джульеттаи» (Меркуцио), «Мишта чIоагIлу болат» (Жухрай), «Революцен цIерагIа» (Йоакъап), «Даьй къонал» (Антон), «Бешто» (Бешто), «Геростат вицвалийтар» (Геростат), «Малав бехке?» (Болотов), «Шин аьлан Iу» (Труффальдино), кхыяраш. Уж вайна юха дага а йохийташ, актёра дизза сурт диллад журналиста ший йоазон тIа. Вешта, Абадиевх духхьал журналист аьлча кIезига хургда укхаза, извар бокъонца вола театровед.Из гIулакх цул дикагIа ховш гIалгIа вацар вай мехка.

Иштта хозача меттаца язъяьяр цо шоллагIйола «Театра дIаденна вахар» яха очерк а. Из хетаяь яр РСФСР халкъа артиста Хадзиев Махьмад-Гирена. Цу хана Къилбаседа-ХIирий Республикан халкъа артист, К.С.Станиславске цIерагIча Российски Федераце Паччахьалкхен преме лауреат мара вацар из. Къаьстта теркам тIаозар из преми цунна яларо. Из хIана еннай дика гучадаьккхар Абадиевс артистах ше дувцача массехк оагIон тIа. Хадзиев а вар дукха дика ролаш ловзаяь, царех яр «ПаьтIамат» (Лага), «Къонгаш бовча хана» (Шамсудин), «Хьал а гIетте, волле!» (Аушев Мухьмад), кхыяраш.

Уж а цун кхыдола йоазош а дешаро, дикка лакхйора са, къонача журналиста говзал. Болх бе денгара денга аттагIа хулийтар. Иштта чIоагIа накъадоалар цо деш хинна хьехамаш. Тайп-тайпара рейдаш е районашка ухача культура, дешара болхлошца командировкех ухийтар со отдела керте латтача Абадиевс. ДагадоагIа, школашка физкультура мишта хьех, спортивни кхоачам миштаб, хьехархоша дешара программаш йизза кхоачашйой хьожаш, Наьсарен районе гIолла рейд яь. Культура цIенош, бе-беча боахамашкара «ЦIе уголокаш» малагIча хьала тIа я дувцаш, газетага гIолла цIенхашттара къамаьл хулар. Цхьайолча хана халкъа боахама кхыча доакъошка еча рейдашта юкъекхувлаш а нийслора. Царех яр мах беча моттигашка, маькх еча заводашка болх мел нийса бу, наьха хьашташ мишта кхоачашду тохкаш хиннараш. Шедар тIадерзадаь дар кхоачамбоацарашцеи зуламашцеи къовсам лоаттабара. Цу тайпара моттигаш нийсъелча, яз ца деш, кхеравенна, кхаъ ийца юхаваргварех вацар са отдела кулгалхо. Иштта болх бе Iомавора со а кхыбола къона журналисташ а. Цул совгIа, гIалгIай метта хIама дика ховш а вар из. Цу хана, хIаьтта университет яьккха волча сона, метта еррига къайленаш йовзацар. Цхьадола хIамаш Бека сай йоазон тIа тоадича, цо уж харцахьа тоаду аьнна хетар сона. Иштта, хIара Iуйрийна планёрка йолча хана, цо леладер нийса ца хеташ, цунна Iоттараш еш, хулар редактор а цун заместитель а. Къаьстта а белгалдоаккхар Абадиевс ший йоазошка запятойш дукха увттаеш хилар. Уж ца йоагIаш увттаю, аьнна, хетар царна. Цу хана сона а хетар. Ха дIа мел йода, гIалгIай грамматика а пунктуаци а дукхагIа мел Iомаю, со кхийтар, цо увттаяь запятойш Iилмо дIадеххача тайпара увттаеш хиннилга. Кхыча тайпара аьлча, Бек гIалгIай мотт тIагIолла Iомабаь а воацаш, цун мел йола бокъонаш йовзаш саг вар. ДIауйла йича хIанз аз тамаш а ю цох, хIана аьлча гIалгIай дешар дешаш хиннавоаццаше, из мотт селлара безаш, Iомабеш из хинна хиларах. Ше деш дола хIама харцахьа-бакъахьа деш оамал яцар цун, кхычар дича а дезацар из талмаста, цунца дог доацаш. Хетаргахьа вахаро Iомаваьвар из иштта къахьега. ХIаьта, аз лакхе хьоаха ма дарра, из цун атта хиннадацар. Массехк дош аргда вай цун вахара наькъах лаьца.

Абадиев Бек ваь хиннав Наьсар-Керте 1938 шера 1июле. Геттара зIамига волаш, кхо шу даьннача хана, эггара чIоагIагIа бера эшаш вола саг воацаш вус из. Вай Сибре дигале хьалха кхалх цун нана. ХIаьта дас шоллагIа саг йоалаю. Даь-сесаг цунца во хиннай оалалургдац сога, хIана аьлча Iийса яхаш даьна ваь воша вар Бека. Дуккхача хана милице болх бир цо коммунистий хьалхле йола Iаьдал латтчача хана. Каст-каста воккхагIволча вешех бIаргтоха «Сердало» газета редакце чувоагIар из. Нах хьагаргболаш хоза бувзамаш а дар цу шин вешийна юкъе. Иштта тIера вар из несийна а веший дезала а.

Вай дохадеча хана, пхи-ялх шу даьнна хиннав Бек. Воккхачоа а ла хала зама текхай цо ше арахьа лелаш. Мел эшар, мел хетар деце а, деша гIерташ, чакхваьннав ше цига мел яьккхача хана. Эггара хьалха мехкабоалача нахаца, Даьймехка воагIа из, шийца боккхагIбарех а зIамагIбарех саг воацаш, ше цхьаьккъа. Цу хана из хиннав кхелета зIамига саг, цун 18 шу даьнна хиннад хьамсарча юрта воагIаш. МоцагIа ший нана йисача, бера ханара дагалоацам бахача юртацара вIашагIкхетар дийца цаваллал дог тохадолийташ хилар. ХIанз дIахо дIабахьа безар кхело шийна бегIа никъ. Деша ваха, ший керттера гIулакх харжа ха эттача, цо хорж гIалгIаша дукха къердаш йоаца вуз. Из къердаш цахилара бахьан хиннад, цига деша баххал говзал, хьаькъала таронаш йолаш бола нах Казахстанера цIадоагIаш вай къаман кIезига хинна хилар. Цул совгIа Бек чIоагIа дог дIаувш а хиннав ше харжа лаьрхIача дешарца. Из Ленинграде вода; театрани, ашарийи, кинематографеи институте багIача кагирхой мугIаре хила ловш. Цун уйла кхоачаш а хул. Бек цига дIа а отт, цул тIехьагIа из толамца чакх а йоаккх. ДIахо цо балхаш даьд вай къаман культура дегIайоалае, дIахьалхакхувла гIерташ. Цхьадолча даькъе цун из вIаштIехьа а доалар. Бакъда биззача боараме ший хьинарах пайда эца витацар из, цо дIаболабаь никъ къоабалбеш боацача наха. Цо болх бу Нохч-ГIалгIай теникий театра директор волаш. Цхьайолча хана, новкъосташа бегаш беш, хоаставора Бек, «теникий паччахь» хинна саг ма вий ер аьле. Цу тайпарча бегашта эгIазводачарех вацар из. «ТIаккха хIаьта!» — алар мара, из шийна хала дергдацар. Бек цу балха тIа волаш, 1973 шера Шолжа-ГIалий тIа хул хIирашкара лаьтташ юхадехаш йола митинг. Цигара гIалгIай бийсаш яха театре чукхийлаб, театран декорацеш Iай ара латтача наха йIовхал ялар духьа, цIер тIа кхувсаш, йоагаяьй аьле бахьан оттадийя, КПСС Ленински районни комитето партера дIавоаккх Бек, цунца цхьана кхыбола гIалгIай а. Цул тIехьагIа балхах а вох из. Цо ше дийцачох, мегаргболча балха дIа ца эцаш, цхьаннахьа къа ца хьийгача ца воалаш, ший доацача гIулакха тIа вахе, дикка ха йоаккх цо. Ха дIа мел йода, кIезиг-кIезига воагIаш, юха меттавоагIа, Х. Нурадилова цIерагIчатеатре а, М. Лермонтова цIерагIча театре а балхаш ду.

Бекб баь хинна бехк шийна кIалха кIийле йоацаш хиннаб. Цхьана балха долча хана, цхьацца-шишша дувцаш, цо оалаш дар:

— Сона бокъонца цига митинг хургйий а нах вIашагIкхетаргбий а хацар, городе кхийттача Арчаков Тухана аллалца. Иштта кийчъеш моттиг я, цига хила деза вай дерригаш, аьнна, цо хьийхавар со къам гуллуча майдан тIа.

ДIахо Абадиев балха дIаэц «Сердало» яхача газете, со цига балха вахача хана, изкультура отдела заведующи вар. Балха тIа моллагIа хала моттиг нийсъелча, зIамагIбарий а ший а дог ураоттадеш, оалаш дешаш дар цун: «Большевикаша хьайоаккхаргйоацаш гIап яц»! ТIаккха ше а велалора из, сакъердам боалар гонахьарчарна а, иштта дIадоладаьча гIулакхацара уйла чIоагIлора.

Оаха цхьана болх беча юкъа дикка эргаяьннаяр газета 3-4-гIа оагIонаш. Дукха керда рубрикаш юкъейоалайир, хьалххе дикка уйла а яь. Наха дукха езаш яр «Дезала кхуврч» яха рубрика. Цунна кIалха кепа еттар дезалашта деча хьехамашта, бераш кхедеча новкъа фу де деза дувцача йоазошта, зIамагIбарашта деша мегаргдолча дувцарашта, стихотворенешта, кхалнаха коа-карта деча балхашта. Яшаехкача хIамашта (сомашта, баьцадаарашта) фу эш дувцар. Хозача сурташца кийчъе хьожар из оагIув. Кагирхошта къаьстта езачарех яр «Спортивни Нохч-ГIалгIайче» яха рубрика. Укхаза бовзийтар керда гучабаьнна спортсменаш, яздора боккхагIчар вахарах. Арсамаков Исраилах олимпийски чемпион хиннача хана, цу рубриканна лаьрхIа йоазув дир гIорваьнна хиннача журналиста, газета редактора заместитела Хамхоев Мустафас. Цул тIехьагIа Исраилах яздир Вышегуров Мухьмада, спортсменах а цун тренерах Кодзоев ИбрахIимах а яздир аз. Цхьаькха тхоаш гIаддига моттиг дагайох укхаза. «Динамо» оалача стадиона тIа яр спортивни гимнастиках йола зал. Тхона вIалла йий а ца ховш, цу чу хиннаяр спорта мастер йолаш Героева яхаш гIалгIай йиIиг. Цох дола йоазув а наьха теркам тIаозаш хилар. ТIехьагIа цу йиIий кхел мишта хиннай хьежар со. Из деша эттаяр Нохч-ГIалгIай педагогически институте. ХIанз из мичай, фу болх беш я белггала сона оалалургдац. Цхьаькха рубрика а яр спорта хетаяь, «Спорт – унахцIенон дIоагIа» яхаш. Укхаза каст-каста кепа еттар физкультурник волча Барханоев Висангире, Гадаборшев Абос, Алиев Iалве, кхычар деча йоазошта. ТIеххьара шиъ «Комсомольское племя», «Ленина никъ» яхача газетий корреспонденташ бар, цунца цхьан тха газета яздора цар спортах лаьца. Бека а аз а дукха ха дIалуш яр «Тхо интернационалисташ да», «Культуреи вахари» яха рубрикаш. Хьалхарчо къаьстта а дукха дувцар интернациональни декхар кхоачашдеш хиннача бIухоех, цар гойтача турпалча гIулакхех. Яздора школашка болх беш хиннача интернациональни доттагIала клубех. Культуреи вахари долча, суртанчий хьажараш, цирка хьаьший, лоархIаме концерташ, театра керда спектаклаш, култура цIеной вахар, кхыдараш дувцар. Цу мугIарера дукхагIа сона дагадоагIа йоазош да «Эсамбаев – Наьсаре», «Вайцига хьоашалгIа – Москвера цирк» яхараш. ДагадоагIа, цирке Игорь Кио, Вахтанг Кикабидзе, уж санна цIихеза артисташ бахкар, цунна хетадаь дар лакхе хьоахадаь шоллагIа йоазув. Цу берригача балхб, из атта а кIезига а болх бацар, кулгал деш хиннар вар Абадиев Бек, цун из дика вIаштIехьа а доалар. Из волча баьхка го йиш яр гIорбаьнна артисташ М. Цицкиев, М-Г. Хадзиев, Р. Наурбиев, Л. Эсмурзиева, Д. Кодзоева, кхыбараш. Цар шоаш а йоазош деш ха хулар газета лаьрхIа.

ГIалгIай республика хьаяьчул тIехьагIа, Бек а цун дезал а цIабаьхка, шоай къаманна юкъе баха хайшар. Цо болх бир краеведчески музея директор волаш, цул тIехьагIа йIаьххача хана ГIалгIай Республикан МВД музея директор хилар цох. Цу хана кийчдаь, цо кепа техар ший «Даьймехка сийдола къонгаш» яхача книжканна. Массехк даькъах латтача цу тIа бувцараш бар эрсий-туркий а эрсий-японски а тIемашка дакъа лаьца бола нах, «Акхача дивизен» юкъе болаш, вай мехка сий, цун доазонаш лорадеш хинна гIалгIай. Царна юкъе гу вайна Боров Анзора, Нальгиев Элберда, Аушев БаIадала, Маматиев Асланбека, Мальсагов Малсага, Добриев Дудара, Боров Заурбека, Боров Султанбека, кхычар цIераш. Къаьсттача мугIарцабелгалъяккха лов сона, чIоаггIа сайна езаенна, цо Гудиев Гудах язъяь хинна очерк. Цу сага деналах, майралах эггара хьалха Бека йоазонга гIолла дайзар сона. Ховш ма хиллара, из хиннав Баку яхача города хьаким. Валар а хиннад цун къонахчун санна, из, топаш тоха суд яь, вийнав.

Бек балха хиннача МВД гаьна доацаш дар Наьсарера доккха маьждиг. Балхара цIавоагIаш хилча, сона гора, цига делкъа ламаз дийя, шоай балха тIа юхаболха бокъонаш лораяра органашкара кагийнах, боккхий нах. Хийла царца хулар Абадиев. Вешта аьлча, Даьлах тешаш, цунна Iамал еш вар журналист, театровед, музея кулгалхо. Лоацца къамаьл хулар са цхьан хана хиннача сай хьакимца. Цох доккха дикахетар а хулар. Иштта Даьла дагавоагIаш саг я цун фусам-нана, вай республике йовзаш йола телевидене корреспондент Абадиева Хьава а. Ер йоазув кийчдеча хана, цунца вIашагIкхета дагахьа телефон техача, из ХьажцIа яха цIагIа яц аьлар сога. Хьава сона йовза а я дукха ха. ДIадахача бIаьшерен 80-ча шерашка из болх беш яр Нохч-ГIалгIай радиокомитета музыкальни редакце. Ший болх дика бовзаш а цох лоархIаеш а яр Хьава. Къаьстта а ала деза, из наха тIера а Iимерза а саг я аьнна. Цхьацца балхаца джувзаденна г1улакхаш д1а-юха леладе дезаш а хиннав со цу эздийча кхалсагаца. Цо дехар а даь, Хамхоев Ахьмада оаз д1аязйир аз, иллиалархо ше дийна волча хана. «Мехкарий» яхача са стихотворенена мукъам а баккхийта, цох илли даьдар Абадиевас. Дуккхача шерашка дийкар из, Дзейтов Тимура дIа а оалаш, Нохч-ГIалгIай телевидене гIолла.

Бекеи Хьавайи къонгаш кхийнаб. Цар бераш а хьадоладеннад. Хоза да цар вахар, бакъда цаI да ца тоъаш, дезала даь оаз, цун кIаьда велавалар. Абадиев Бек кхелхав 2015 шера. Нагахьа санна цунна нах безар, ший къаманна гIулакх хьалхадоахаш хинна хилар теркалдича, из цIаккха а вицвала йиш яц, аьнна, хет сона.

С. Арчаков


Последние новости Ингушетии по теме:
Къаман гIулакха лаьтта саг

Къаман гIулакха лаьтта саг - Магас
Дукха нах баьхаб, хIанз а бах вай мехка, шоай гIулакх тIехьатетташ, мел йоккха хало шоашта хуле а, къаман юкъара гIулакх хьалхадоахаш.
18:13 06.09.2017 Skforussia.Ru
- Магас
Дукха нах баьхаб, хIанз а бах вай мехка, шоай гIулакх тIехьатетташ, мел йоккха хало шоашта хуле а, къаман юкъара гIулакх хьалхадоахаш.
16:52 06.09.2017 Сердало
 
По теме
Бераш – вай кхоане я. Тахан вайга хьа а кхаьча, вай леладер, кхоана шоаш вай ханага хьаайттача, вайгара дIа а ийца, дIахо дIадахьа дезараш ба уж.
06.09.2017
 
Дукха ха йоацаш ГIаьбартой-Балкхарой республикерча Султан Ураган яхача иллиалархочунга ладувгIаш вагIаш, цо юха дагайохийтар сона 70-ча шерашка хинна Наьсареи цу ханара цун кагий нахи.
29.08.2017
Артиста  Никъ - Сердало Дукха ха йоацаш ГIаьбартой-Балкхарой республикерча Султан Ураган яхача иллиалархочунга ладувгIаш вагIаш, цо юха дагайохийтар сона 70-ча шерашка хинна Наьсареи цу ханара цун кагий нахи.
29.08.2017
Дукха ха йоацаш, газето дийцар профессора Дахкильгов ИбрахIима 80 шу дизара хьакъехьа.
26.08.2017
 
Дика суртанча - Сердало Дукха ха йоацаш, газето дийцар профессора Дахкильгов ИбрахIима 80 шу дизара хьакъехьа.
26.08.2017
(дувцар) Боккхача новкъа а даьнна, баIай босах хьалдийрзар юртара жаIул.
24.08.2017
ЦIийоацар - Сердало (дувцар) Боккхача новкъа а даьнна, баIай босах хьалдийрзар юртара жаIул.
24.08.2017
 
Наьна меттаца дувзадаь вахар - Сердало (Шадиев Султана 80 шу дизарга) Со зIамига кIаьнк волча хана денз, тха цIагIа хулаш а дешаш а хиннад «Сердало» газет.
18.08.2017
МоллагIча сага вахаре эггара лоархIамегIеи халагIеи долча декхарех цаI да, ший къахьегама никъ хоржилга.
11.08.2017
 
Беркате никъ - Сердало МоллагIча сага вахаре эггара лоархIамегIеи халагIеи долча декхарех цаI да, ший къахьегама никъ хоржилга.
11.08.2017
Следователи выясняют причины кровавой ссоры между двумя соседями со стрельбой и поножовщиной в ингушском селении Троицкое - Ингушетия Следственным отделом по Сунженскому району следственного управления СКР по Ингушетии возбуждено уголовное дело по факту убийств в результате ссоры двух соседей в сельском поселении Троицкое.
20.05.2018 Ингушетия
Архив Ингушские полицейские пресекли деятельность организованной преступной группы из шести человек, занимавшейся торговлей наркотиками, сообщили газете «Ингушетия» в пресс-службе республиканского МВД.
18.05.2018 Ингушетия
В Назрани, недалеко от строительного магазина «Сити-строй», в собственной машине обнаружен труп мужчины со сквозным ранением головы, сообщил газете «Ингушетия» источник в правоохранительных органах.
18.05.2018 Ингушетия
Прокуратура республики утвердила обвинительное заключение по уголовному делу в отношении 41-летней местной жительницы, обвиняемой в совершении преступления по ч. 3 ст.
17.05.2018 Ингушетия
Званием Заслуженного экономиста Ингушетии и юбилейной медалью «25-летие РИ» глава РИ удостоил этнического ингуша-Михаила Гуцериева - Magas.Ru Из соц.сети главы РИ Накануне принял участие в творческом вечере человека большого таланта,в котором прекрасно сочетается поэт,композитор,один из самых успешных бизнесменов,Михаила Гуцериева.
20.05.2018 Magas.Ru
«Золотое древо с саблезубыми антилопами» можно будет увидеть в Ингушетии в «Ночь музеев» - Ингушетия В Ингушском государственном музее краеведения имени Тугана Мальсагова в «Ночь музеев», которая пройдет по всей стране завтра, 19 мая, пройдет выставка одного экспоната.
18.05.2018 Ингушетия
Делегация из Ингушетии представляет республику на итальянском фестивале «Летний сад искусств» - Ингушетия Творческая делегация из Ингушетии представляет свою культурную программу на фестивале «Летний сад искусств», который проходит в эти дни в итальянском городе Бари, сообщает пресс-служба республиканского Министерства культуры.
18.05.2018 Ингушетия
Ингушский театр юного зрителя принимает участие в VI Международном фестивале театров кукол «Рабочая лошадка», который в эти дни проходит в городе Набережные Челны Республики Татарстан, сообщает пресс-служба творческого коллектива.
18.05.2018 Ингушетия
Моя жизнь — производная от внутренних вероубеждений Ваха Остапович Хадзиев Ваха Остапович Хадзиев — народный артист Республики Ингушетия, талантливый, самобытный, подкупающий своей искренностью, убедительный на сцене,
16.05.2018 Ингушетия
Детский хореографический ансамбль «Сийг» представит Ингушетию на региональном фестивале-конкурсе молодых исполнителей «Я — талант», сообщает пресс-служба Республиканского дома народного творчества.
18.05.2018 Ингушетия
Ахмед Осмиев Боксер Иса Чаниев и его менеджер Хусейн Бузуртанов во время пресс-конференции в пресс-центре «Ингушетии» передали в дар газете перчатки, в которых спортсмен выходил на поединок с Исмаэлем Барросо.
17.05.2018 Ингушетия
    Специалистами отдела земельного надзора Управления Россельхознадзора по Республике Ингушетия по результатам полученных протоколов испытаний почвенных проб на агрохимические показатели,
18.05.2018 Служба по ветеринарному и фитосанитарному надзору