​Лоаман мехка воI

​Лоаман мехка воI
Фото: serdalo.ru

Цхьавола саг хул, дунен чу мел вах наха дукха везаш, велча а цар безам дIа ца боалаш. Цу тайпарча сагах, Дала даькъалаваь саг ва оал. Ишттача нахах вар духхьала нохчий къаман воI хинна ца Iеш, массадолча ДаьгIастен къамашта везаш хинна Дагаев Валид. Са вахаре а дикка хоза лар йита саг ва из, со зIамига бер долча хана денз. Сона дагадоагIа, тха нанас ийцаяр «Весна» яха, пластинкаш лакха а таро хулийташ йола радиоприемник. Дукха тайп-тайпара ашараш, иллеш дар тха цIагIа, бакъда эггара дукхагIа декаш хиннараш Валида дIаоалаш хинна иллеш дар. Къаьстта а боча дар сона а са вежарашта а «Даь васкет» яха илли. Цун дешаш яздаьр Сулейманов Ахьмад яха гIорваьнна поэт вар, хIаьта а уж мугIараш кIоаргга адамий дегашка кхоачадаьр Дагаев вар ала мегаргда майрра. Нана, Даьхе еза со эггара хьалха Iомаваь мугIараш уж дар ала йиш йолаш ва со тахан.

Наьсаре ГI. Ахриева цIерагIа «Электроинструмент» зовод йолча хана, цун актови зале бе-бе кинофильмаш хьокхар, концерташ хулар. Цкъа цига Дагаев Валиди Магомедов Султани боагIа болхлошта концерт дала, аьнна, хезар сона а са ханарча новкъосташта а. Билет доацаш цига чудутаргдац шо яххаше а, ца дахача Iедаланзар тхо, цу артисташцарча безама. Цу ханале тхона довзаш дар цар шинне дIаоалаш дола Чахкиев СаIида стихашта даьха «Гуйре», «Наьсарера мехкарий» яха а кхыдола а иллеш, цар кхы тIа а чIоагIбаьбар иллиалархошцара безам. Цудухьа, фухха хуле а, концерт долча цIенгахьа бихьар оаха тхоай никъ. Балха ди чакхдала гаргагIертадар, берригаш актови зал йолчахьа ухар, бакъда тхо чудита лаьрхIа бацар хаьхой. Арара наIараш къайла яр. Юххера сатийра чухьнахьа. Арахьа-м баьнна никх мо хьувзаш бераш дар. Дукха ха ялале, уж а концерт долча лакхе хьалчудигар. ЧIоагIа тоам хилар цу сайренах цига мел хиннача наьсархошта.Цул тIехьагIа а каст-каста гIалгIай вежарий болча воагIаш оамал яр Дагаев Валида.

Университете деша а этта, шоллагIа курс аз яьккха ха яр из. Ахкан замалахьа Новосибирске нийсвелар со. Гаьнарча цхьан юрта дар тхо болх беш. Студента дукха ма эший дувха а даа а, аьхки кIезиг-дукха къахьега ловш вахавар со а цига. Цхьан сарахьа каьхаташка хьежжа оттадаь концерт дар радио чу. Областе, тхо доацаш а, дукха нах бар вай мехкара балха баьхка, цу даькъе нохчий а болаш. Цар яздаьча каьхата жоп луш, моттигерча радио чу дийкар нохчий илли. Дукха везача иллиалархочун оаз хезача, боккха тоам хилар сона а соцарча новкъосташта а. Арахьа иштта деза хет наьна метта е цун гаргара болча нохчий метта оала дош.

Шолжа-ГIалий тIа студентий общежите вахар со, «Минутка» оалача моттиге яр из, Махачкалински урамагIа. Тхо делкъийга хIама даа ухаш яр «Махачкала» яха кафе, цига санна лагман кийчъеш моттиг яцар ерригача городе, иштта чам болаш хулар из. Цхьан дийнахьа цига тхо чудахача, Дагаев Валид вайра тхона ший новкъостаца.Уж, тхо чудахкале Iохайша, хIама дуаш бар. Тхоаш Iо мишта хайшар, хьал мишта гIайттар, оахош хIама мишта диар ханзар тхона, тха беррига теркам тIабийрза бар цIихезача иллиалархочоа. ВIалла хIама ца диача а, диза дар тхо хIанз, селлара боккха тоам бир тхона дагадоацаш хиннача цу вIашагIкхетаро.

Университета 4-5 курсашка волаш, Хамхоев Ахьмада гIо-новкъостал деш вар со, из ше бIаргса доацаш воландаь. Тхо цунца республике гIолла дIа-юха ухар, къахьегама коллективашца вIашагIдетталора, стихотворенеш ешар, хаттарашта жоп лора. Цкъа Нохч-ГIалгIай йоазонхой Соза литературанна пропаганда еча отдело Наурерча набахта хьожадир тхо, цигарча лийца боахкача нахаца къамаьл дергдолаш. Тхо цига дIакхаьча дукха ха ялале, цига тIабаьхкар тхо санна цига хьаожабаь нах: иллиалархо Дагаев Валид, поэт Сулаев Мухьмад, йоазонхо Боков Ахьмад. ХIанз, со а волаш, пхиъ вар тхо. Со геттара къона вар царна юкъе. Масийтта наIарах чакхдаьха, йоккха йоацача майдан хьалхашкарча эстрада тIа Iоховшадир тхо. Лийца боахкача наха тIабийхача Iаьржача гIирсо кхы а баьдегIа хетийтар из сайре. Массанега фийла ладувгIар цар, хIаьта, аз зийначох, эггара дукхагIа дезаделар царна Валида дIааьнна иллеш. Кхыча дешашца аьлча, лийца боахкача наха а вовзаш, дукха везаш саг вар тхоца хиннар. Цу масало хьагойт, наьха безам цунца айхха бувзабенна хилари из боккха хилари.

Шолжа-ГIалий тIа дешаш, цул тIехьагIа вахаш, пхийтта шу даьккхар аз. Цу юкъа гIалий тIа водаш, воагIаш, кIезига гора из. Хетаргахьа, мукъа ха кIезига йолаш иллиалархо вар Дагаев. Филармоне солист хиларах тарра, коцерташца дIа-юха ухаш йоаккхар цо ший дукхагIйола ха. Цудухьа гуцар из тхона а.

Эккажкъонгий-Юрта латтар со Сурхо тIа бодача наькъа йисте. Цхьа шу гаргга ха хила мег из хинна. Со балха ваха араваьннавар. Юххе гIолла тIехъяьнна дIайодача машина чу ваьгIа саг Валидах чIоагIа тара хийтар сона. Из машин тIехъяьнна дIаяхар, бакъда са дег чу дукха уйлаш сомаяьхар цо. Сона юха а дагавера дукха веза иллиалархо, цун иллеш, дега тоам беш йола оаз. Иштта лелалуш вале, ловча гIолва из, аьнна хийтар сона. Цу дийнахьа цунна уллув вагIаш, машен лехкаш хиннача сага чIоагIа баркал ала безам хилар са. ХIана аьлча цхьа ший тайпара йIовхал йоссайир цо са дег чу, из саг бIаргавойтарах.

Дагаев Валид тIеххьара дагавохар хилар тха, из кхалхале ши-кхо ди хьалха. «СелаIад» яхача берий журнале, Валида иллешка интернете гIолла ладувгIаш со вагIаш, цига чувера йоазонхо а цу журнала редактор а Мерешков Султан. Иллешка ла а дувгIаш, уж дувца а дувцаш, Дагаева говзалах, цунцарча безамах дувцаш, дикка ха яьккхар оаха шинне. Цу хана тхона дага дацар кхы а массехк ди даьлча тхоашта ийрча хоам хозаргболга. Из вайцара къастар чIоагIа новкъа да аьнна хет сона, духхьал нохчашта хинна ца Iеш, из мел вовзаш, цун иллешка ладувгIаш кIеззига а ха яьккхача наха. Дала къахетам болба цох. Дукха ха яларах, сона а са ханарча наха а вицлургвац лоаман мехка визза воI хинна Дагаев Валид.

С. Арчаков,

йоазонхо.

Газета «Сердало» №149

 
По теме
В связи с предстоящим юбилеем 100-летия образования ингушской государственности, Министерство культуры напоминает о Республиканском конкурсе на создание лучшей композиции, в рамках подготовки к юбилейному праздничному мероприятию.
Источник фото: Фото редакции Полиция от местной жительницы узнала, что женщина, которая назвалась Светланой Федоровой, под предлогом продажи посредством соцсетей мебели, бытовой техники и посуды, в 2022-2023 гг.
Источник фото: Фото редакции Национальный проект «Демография», как известно, нацелен на улучшение благосостояния семей за счет мер финансовой помощи, которые будут способствовать повышению рождаемости,
Глава Ингушетии Махмуд-Али Калиматов проверил, как ведутся восстановительные работы в многоквартирном доме, который пострадал в ходе проведения контртеррористической операции в Карабулаке.
В Государственном музее изобразительных искусств Республики Ингушетия открылась выставка произведений живописи «Вместе с Россией!».
photo_5343742741852575501_y (1) - Министерство культуры ГБУ «Филармония им. А. Хамхоева» станет организатором конкурса, в котором могут принять участие все желающие.
Министерство культуры
В ОФСИН России по Республике Ингушетия прошли пожарно-тактические учения - ОФСИН по Республике Ингушетия Сотрудниками ведомственной пожарной охраны ОФСИН России по Республике Ингушетия совместно с работниками пожарно-спасательной части № 4 г. Карабулак МЧС России по региону были проведены занятия,
ОФСИН по Республике Ингушетия
Суд апелляционной инстанции по уголовным делам Верховного суда Ингушетии 28.03.2024 рассмотрел материал досудебного производства по апелляционной жалобе защитника на постановление Магасского районного суда,
Верховный Суд
Корь - это острое инфекционное заболевание, характеризующееся общей интоксикацией, воспалительными явлениями со стороны слизистых глаз, носоглотки, верхних дыхательных путей, характерной сыпью.
Роспотребнадзор
В рамках реализации всероссийского проекта «ДоброВСело» врачи Сунженской центральной районной больницы совместно с волонтерами-медиками провели масштабное профилактическое мероприятие в сельских поселениях Чемульга и Аршты.
Газета Ингушетия
Стартовал региональный этап Всероссийского конкурса исследовательских проектов «Без срока давности» - Министерство Образования С 20 марта стартовал региональный этап Всероссийского конкурса исследовательских проектов «Без срока давности», который продлится до 10 апреля 2024 года.
Министерство Образования